Neft Fondu
BP-nin səhmlərini alır?
“Neft
pullarının BP-nin səhmlərinin alınması yönəldilməsi
indiki halda məqsədəuyğun deyil”
Dünyanın aparıcı neft şirkətlərindən olan BP-nin
Meksika körfəzində yerləşən platformasında baş verən
qəza sözügedən şirkətin həyata keçirdiyi
proqramların bəzilərinin ixtisar edilməsinə səbəb
olmaqla yanaşı səhmlərinin də qiymətinin dünya
bazarında azalmasına səbəb olub. Hətta bəzi qlobal
iqtisadi dairələrdə BP-nin müflis olub-olmaması da
gündəmdə olan məsələlərdəndir. Mesksika körfəzində
baş verən qəzanın nəticələrinin aradan
qaldırılmasına 2 milyard dollar ayrılacağı
gözlənilsə də artıq 3,5 milyard dollara yaxın
vəsait xərclənsə də qəzanın nəticələrini aradan
qaldırmaq mümkün olmayıb. Eyni zamanda, şirkət ətraf
mühütə vurduğu ziyana görə ABŞ məhkəməsi qarşısında
cavab verməlidir. Bu isə təbii ki, neft şirkəti üçün
yeni xərclərin yaranacağından xəbər verir.
Bu günlərdə BP prezidenti Toni Heyvardın Bakıda
səfərdə olması səhmlərin bir hissəsini Azərbaycana
satmaq istədikləri barədə informasiyaların
yayılmasına rəvac verib.
Güman olunur ki Dövlət Neft Fondunun vəsaitlərinin
bir hissəsi BP səhmlərinin alınması üçün nəzərdə
tutulub.
İqtisadi və Sosial İnkişaf Mərkəzinin rəhbəri Vüqar
Bayramov hesab edir ki bütövlükdə BP şirkətinin
satışa çıxarılan səhmlərinin alınması indiki dövrdə
sərfəli deyil: "Əvvəla narahatedici məqam ondan
ibarətdir ki Dövlət Neft Fondunun vəsaitlərinin
istifadəsilə bağlı xüsusi bir konsepsiya və mexanizm
yoxdur. DNF vəsaitlərinin xaricdə səhmlərə
yerləşdirilməsi və yaxud da daxili ehtiyacların
ödənilməsilə bağlı hər hansı bir əsaslandırma
aparılmayıb. Təbii ki bütün bunlar müəyyən
narahatlıq doğurur. Məhz bunun nəticəsidir ki DNF
2008-ci ildə praktiki olaraq vəsaitlərin yenidən
qiymətləndirilməsi nəticəsində kifayət qədər ciddi
itki ilə üzləşdi. Bu birbaşa onunla bağlıdır ki
DNF-nin investisiya səbəti doğru
formalaşdırılmadığından kifayət qədər itkilərə
gətirib çıxardı. Bütün bunlar ondan xəbər verir ki
DNF-nin investisiya siyasəti mükəmməl deyil. Ona
görə də DNF vəsaitlərinin bir qisminin BP-nin
səhmlərinin alınmasına yönəldilməsini birmənalı
qiymətləndirmək olmaz. Nəzərə almaq lazımdır ki
BP-nin Meksika körfəzində baş verən qəzanı aradan
qaldırmaq üçün nə qədər vəsait xərcləyəcəyi məlum
deyil. Bu istiqamətdə BP 2 milyard dollar xərcləməyi
planlaşdırsa da hazırda bu rəqəm 3,5
milyard dollara çatıb. Eyni zamanda onu da nəzərə
almaq lazımdır ki hətta qəzanın nəticələri tam
aradan qaldırılsa belə BP-ni ABŞ-da kifayət qədər
böyük məhkəmə gözləyir. Ona görə də BP-yə məxsus
səhmlərin gəlirliliyi və yaxud da rentabelli
olub-olmaması sual altındadır".
V.Bayramovun fikrincə BP böyük şirkət olsa da bu gün
kifayət qədər ciddi problemlərlə üz-üzədir: "BP
artıq bir sıra ölkələrdə həyata keçirdiyi
proqramların ləğv edilməsi və yaxud da
dayandırılması haqda qərar qəbul edib. Təbii ki o
baxımdan indiki situasiyada BP-nin səhmlərinə vəsait
yönəltmək doğru deyil. Çünki BP-nin xərcləri
artdıqca bu şirkətin səhmləri aşağı düşəcək. DNF
BP-nin səhmlərini almaq istəyirsə indi bunun üçün
doğru vaxt deyil. Yox BP-nin səhmlərinin bir
hissəsini almaq istəyirlərsə yaxşı olardı bir müddət
gözləsinlər. Çünki gedən proseslər onu göstərir ki
qarşıdakı aylarda BP-yə məxsus səhmlərin kəskin
ucuzlaşacağı qaçılmazdır. Çünki BP kifayət qədər
problemlərlə və xərclə üz-üzədir. Təbii ki bütün
bunlar səhmlərə olan tələbatın azalmasına və eyni
zamanda gəlirlərin azalması fonunda BP-nin
səhmlərinin qiymətinin daha da aşağı düşəcəyinə
gətirib çıxaracaq. Ona görə də alınacaq BP səhmləri
rentabelli olmayacaq. Qlobal maliyyə böhranı
göstərdi ki vəsaitləri xarici səhmlərə yönəltmək heç
də arzuolunan deyil. DNF vəsaitlərin xaricdə idarə
olunmasından 3 faiz gəlir əldə edirsə ölkə daxilində
fəaliyyət göstərən sahibkarlar kreditləri 20 faizlə
götürürsə bu heç bir məntiqə sığmır. Ona görə də
yaxşı olardı ki DNF vəsaitlərini sərfəli şərtlərlə
kiçik və orta sahibkarlığın inkişafı naminə kredit
formasında versin. Bu halda sahibkarlar yüksək
faizlə kredit almayacaqlar və DNF ölkə daxilindən
daha çox gəlir əldə edəcək".
İqtisadçı alimin fikrincə, Azərbaycan BP-nin
səhmlərini almaq niyyətindədirsə o zaman bir müddət
gözləməsi daha məqsəduyğundur. Yaxın zamanlarda
şirkətlərin səhmlərinin qiymətinin artması
gözlənilmir, əksinə güman edilir ki, qiymət
azalmaları davam edəcək. İri şirkətlərin səhmləri
daha da ucuzlaşanda belə alqılar daha rentabelli
hesab edilir. Eyni zamanda qlobal maliyyə böhranı bu
cür alqı-satqıları daha da riskli edib.
|