Avronun gələcək aylar üçün məzənnəsi bəlli oldu

 Vüqar Bayramov: “Ilin sonuna 1 avro 1 dollar 40 sentə satılacaq"

 Azərbaycanda avronun manata nisbətən rəsmi məzənnəsi 98,7 qəpiyə düşüb. Bu, 2002-ci ildən bəri ən aşağı həddir. Xatırladaq ki, Avropa Birliyinin mayın 9-da keçirilmiş növbədənkənar yığıncağında 720 milyard avro büdcəyə malik antiböhran fondunun yaradılması qərarı da Avropa valyutasının xilas edə bilməyib. İnvestorlar hələ də bu valyutaya etibar etmirlər. Elə bunun nəticəsidir ki, dünya bazarlarında qızıl yenidən bahalaşma sürəti götürüb. Almaniya kansleri Angela Merkelin avronun çökməsinin Avropa Birliyinin dağılmasına gətirib çıxaracağı, ABŞ-ın Federal Ehtiyat Sisteminin sabiq rəhbəri Pol Volkerin avrozonanın dağılma ehtimalı ilə bağlı açıqlamaları inverstorları daha da qorxudub.

İsveçrənin UBS bankı isə avronun  ilin sonuna kimi dollara nisbətən dəyərini daha 8% itirəcəyini açıqlayıb. Bankın pronozuna görə, avronun dollara məzənnəsi ilin sonuna $1,15-ə, 2011-ci ilin sonuna isə $1,10-a düşəcək. Royal Bank of Scotland-ın valyuta strateqləri hesab edir ki, ilin sonuna avro  $1,1650-yə, 2011-ci ilin ortalarında isə $1,14-ə düşə bilər.

İqtisadçı-ekspert  Vüqar Bayramov isə bildirir ki, son aylar avronun dollara nisbətən azalmasına baxmayaraq avronun  məzənnəsinin dəyişməsi ilə bağlı münasibət birmənalı deyil: “Nəzərə almaq lazımdır ki, avronun dollara nisbətən məzənnəsi kəskin aşağı düşüb. Buna əsas səbəb kimi   Yunanıstanda baş verən hadisələr göstərilsə də valyuta bazarının müşahidəsi ondan xəbər verir ki, heç də avronun dollara nisbətən məzənnəsinin aşağı düşməsi  Yunanıstanda baş verən hadisələrlə bağlı deyil. Çünki Yunanıstan Avropa Birliyinin ümumi daxili məhsulunun cəmi 3 faizini təşkil edir”.

Böhranın Yunanıstandan İtaliya və İspaniyaya keçməsi ilə bağlı açıqlamalar verildiyini xatırladan V.Bayramov deyir ki, son 4 ayın yekunlarına görə, İspaniyada  ümumi daxili məhsulun artımı baş verib: Bu ondan xəbər verir ki, böhranın yeni dalğası İspaniyaya keçmir. Avropa Birliyi ölkələrində müəyyən iqtisadi düşüş  var amma bütövlükdə bu, avronun məzənnəsinin dollara  nisbətən kəskin aşağı düşməsi üçün iqtisadi əsas yaratmır. Avronun məzənnəsi ilə bağlı bir məsələyə diqqət yetirmək lazımdır ki, indiki halda avronu satmaq arzuolunan deyil”. Çünki, valyutanın satışı ilə bağlı iqtisadi yanaşmalara görə, adətən valyutalarıın, eləcə də qiymətli əşyaların  qiyməti kəski düşəndə investorlar onların satmaqda maraqlı olmurlar. Bu  dövrdə əksinə həmin valyutaları almaqda maraqlı olurlar”.

V.Bayramov hesab edir  ki, indiki halda Mərkəzi Bankın , o cümlədən Dövlət Neft Fondunun və kommersiya banklarının  avro ehtiyatlarını çox ucuz məzənnə ilə satmaları arzuolunan deyil: “Həmin  valyitalar kifayət qədər yüksək kursla alınmışdı. Avornun dollar nisbətən məzənnəsinin tendensiyasının təhlili göstərir ki, avronun məzənnəsində müəyyən artımlar olacaq. Proqnozlara əsasən may ayında  avronun məzənnəsinin stabilləşməsi müşahidə ediləcək. Baxmayaraq may ayında avronun orta məzənnəsi 2010-cu ilədə ən aşağı məzənnə olub, amma may ayında 1 avro üçün 1,26 dollar kursun olacağı proqnozlaşdırılır. Güman edilir ki, iyun ayında avronun məzənnəsində stabilləşmə olsa da belə  məzənnədə kəskin olmayan cüzi azalma tendensiyası davam edəcək. Növbəti ay avronun dollara nisbətən orta məzənnəsi 1 dollar 24 sent təşkil edəcək”.

İyul ayında avronun məzənnəsinin yüksələcəyinin proqnozlaşdırıldığını deyən ekspert bunun üçün  müəyyən psixoloji və eləcə də iqtisadi faktorların olacağını əlavə etdi: “İyul ayında Avropa ölkələri üzrə 1-ci yarımilliyin yekunları elan ediləcək.Yarımilliyin yekunları investorların gözlədiyi kimi heç də acınaczaqlı olmayacaq. O baxımdan avronun məzənnəsində artımlar gözlənilir. 1 avro təxminən 1,28 dollara qədər yüksələcək. Avqust ayından başlayaraq isə avronun məzənnəsində artımlar davam edəcək. İlin sonuna doğru avro cari ilin əvvəlində olan mövqeyini bərpa edəcək. Hətta 1 avronun 1 dollar 40 sentə satılması proqnozlaşdırılır”.

Ekspertin yekun qiymətləndirməsinə görə,  son aylar avronun məzənnəsinin aşağı düşməsinə baxmayaraq  ilin ikinci yarısında   avronun dollara nisbətən məzənnəsinin artması proqnozlaşdırılır: “Bütün bunları nəzərə alsaq  dövlət qurumları, eyni zamanda banklar üçün avro ehtiyatlarını  satmaq  düzgün deyil.