Vüqar Bayramov Avropa ölkələrində mühazirə deyəcək

İqtisadi və Sosial İnkişaf Mərkəzinin rəhbəri mayın 8-dən 17-dək bir sıra Avropa ölkələrində enerji təhlükəsizliyi mövzusunda mühazirələr deyəcək. Mərkəzin mətbuat xidmətinin məlumatına görə, əvvəlcə Vüqar Bayramov Novreç Xarici İşlər Nazirliyi tərəfindən Oslo şəhərində təşkil edilən beynəlxalq konfransda çıxış edəcək. Daha sonra azərbaycanlı iqtisadçı Varşavada Polşa Elmlər Akademiyasında Avropanın enerji təhlükəsizliyi mövzusunda çıxış edəcək. Cənab Bayramov Avropa səfəri çərçivəsində Frankfurt və Vyana Universitetlərində də müəllim və tələbələr ilə görüşəcək və enerji məsələləri mövzusunda çıxış edəcək.  

Vüqar Bayramov bildirib ki, Avropa Birliyi Şərqi Tərəfdaşlıq Proqramının icrasına başladıqdan sonra enerji təhlükəsizliyi məsələləri Avropanın gündəmindədir: “Avropa Birliyi ölkələrinin mavi qaza olan tələbatının 46 faizi, Mərkəzi və Şərqi Avropa ölkələrininin qaz təchizatının 80 faizi Rusiyanın Qazprom şirkəti tərəfindən qarşılanır. Bu baxımdan Rusiyadan yan keçən yeni kəmərlərin tikintisi Avropa Birliyi üçün önəm daşısa da indi diqqət daha həmçinin enerji səmərəliliyi məsələlərinə yönəldilib. Bu baxımdan görüşlərdə yalnız Xəzər körfəzi ölkələrinin, eləcə də Azərbaycanın Avropanın enerji təhlükəsizliyinə verəcəyi töhvə ilə deyil, həmçinin enerji səmərəliliyinin artırılması məsələləri müzakirə ediləcək”.

Xatırladaq ki, yalnız ötən il V.Bayramovun əsərləri Avropanın 5 nüfuzlu jurnalında çap edilib və azərbaycanlı iqtisadçının adı ABŞ-da dünya ensklopediyasına daxil edilib.