“Avtomobillərin könüllü sığortası" qaydası dəyişdirildi

Vüqar Bayramov: “Sığorta üzrə yeni vahid qaydalar mütərəqqi hesab edilə bilər”

Gələn aydan “Avtomobillərin könüllü sığortası" üzrə vahid qaydanın  tətbiqinə başlanılacaq.  Belə ki,  əvvəllər "Avtomobillərin könüllü sığortası" Azərbaycanda fəaliyyət göstərən sığorta şirkətləri tərəfindən hazırlanan xüsusi sığorta paketləri çərçivəsində həyata keçirilirdisə, vahid qaydaların təsdiqindən  sonra kreditə götürülən avtomobilin sığortalanması üçün sığorta şirkətinin seçilməsində müştəriyə tam seçim imkanı veriləcək. Qeyd edək ki, Vahid qayda Azərbaycan Mülki Məcəlləsinə, "Sığorta fəaliyyəti haqqında" qanun və Azərbaycanın digər qanunvericilik aktlarına uyğun hazırlanıb.

 Dəyişikliyə münasibət bildirən iqtisadçı-alim Vüqar Bayramov qeyd edir ki, vahid qaydanın tətbiqindən sonra kreditlə avtomobil alan şəxslər elə həmin şirkətdə avtomobilləri sığortalamağa məcbur olmayacaqlar: “Onların sığorta paketini seçmək imkanları olacaq. Eyni zamanda  kretidlə avtomobil alanlar sığortanın müddətini müəyyənləşdirə biləcəklər. Bu da avtomobillərini sığorta etdirənlərin bunun üçün daha az vəsait ödəmələrinə imkan  verəcək. Əvvəlki qaydalarda sığortanın müddəti avtomobil və ya sığorta şirkəti tərəfindən müəyyən edilirdi”.

V.Bayramov yeni qaydaları daha mütərəqqi hesab edir. Müətəxəssisin fikrincə, yeni qayda kreditlə avtomobil alanların sığorta xərclərinin azalmasına gətirib çıxaracaq: “Bu artıq avtomobil alanlar üçün sığorta probleminin yumuşalmasına səbəb olacaq. Seçim imkanı daha ucuz və səmərəli paketlərdən istifadə imkanı yaradacaq. “Avtomobillərin könüllü sığortası" üzrə vahid qayda sığorta paketinin verilməsinin məqsədləşdirilməsinin qarşısını alacaq”

.