Banklar birləşəcəklərmi?

Vüqar Bayramov: “Son proseslər bankların biləşməkdə maraqlı olmadığını göstərir”.

"Zəif banklar, fəaliyyət göstərə bilməyən və bütövlükdə bank sisteminə və bank sferasının etibarına problem yarada biləcək banklar bu sistemdən uzaqlaşdırmalıdır". Bunu Mərkəzi Bankın İdarə Heyətinin sədri Elman Rüstəmov bildirib.Onun sözlərinə görə, bu cür hallar bütün dünyada müşahidə edilir: “Analoji  proses həm ABŞ-da, həm də qonşu Rusiyada gedir. Bütün ölkələrdə zəif banklar sistemdən uzaqlaşdırılır”.E.Rüstəmov bankları konsolidasiyaya dəvət edərək, fəaliyyətlərini düzgün qurmaq  və daha geniş biznesə malik olmaq üçün birləşməyə çağırıb: “Hesab edirəm ki, yerli banklar özləri könüllü birləşməlidirlər və konsolidasiya olmalıdırlar”.

E.Rüstəmovun çağırışına münasibət bildirən İqtisadi və Sosial İnkişaf Mərkəzinin rəhbəri Vüqar Bayramovun fikrincə, bu dəfəki birləşmə çağırışı əvvəlkilərdən fərqlənir: “Belə ki, Mərkəzi Bank əvvəllər bankların birləşməsini məqsədəuyğun hesab edirdisə, artıq qurum bankları könüllü şəkildə birləşməyə dəvət edir. Bu da o deməkdir ki, banklar könüllü  birləşmədikləri halda Mərkəzi Bank onların lisenziyalarını geri alacaq”.

2009-cu ilin sonunda Mərkəzi Bankın bankları birləşməyə çağırdığını xatırladan iqtisadçı deyir ki, artıq bir il keçir və banklar tərəfindən belə addım atılmayıb: “  Bunun səbəbi odur ki, Azərbaycanda biznes subyektlərinin birgə fəaliyyət təcrübələri yoxdur. Əksər Azərbaycan şirkətləri, banklar fəaliyyətlərini dayandırmağa razıdırlar, amma birləşməyə yox. Bu da onun nəticəsidir ki, özəlləşdirmə müəssisələrinin 90 faizindən artığı 1 şəxs tərəfindən idarə olunur”. İqtisadçının sözlərinə görə,  fəaliyyətlərini bərpa edə bilməyən kommersiya bankları birləşməklə bağlı qərar qəbul etmədikləri halda Mərkəzi Bank onların lisenziyalarını geri alacaq: “Bir sıra banklar nizamnamə kapitalının formalaşmasında  problemlərə malikdirlər. Onlar Mərkəzi Bankın tələb etdiyi 10 milyon manat  nizamnamə kapitalını formalaşdıra bilmirlər.İndiki halda onların birləşməsi məqbuldur. Birləşməklə banklar  nizamnamə kapitalı ilə bağlı tələbi yerinə yetirə , o cümlədən faəliyyətlərini bərpa edə bilərlər. Amma son proseslər bankların biləşməkdə maraqlı olmadığını göstərir”.

Ekspert E.Rüstəmovun çağırışını nizamnamə kapitalını yerinə yetirə bilməyən banklara son çağırış kimi dəyərləndirir: “Mərkəzi Bankın indiki açıqlamasının daha ciddi olduğu güman edilir. Kommersiya bankları Elman Rüstəmovun çağırışını qəbul etməsələr çox yaxın zamanlarda  bir neçə bankın lisenziyası geri alınacaq”.