Mənzillərin qiymətindəki azalmalar davam edəcək  

Vüqar Bayramov: “Əmlak bazarındakı vəziyyət mənzillərin qiymətlərinin azalmasına iqtisadi əsas yaradır”

Qlobal iqtisadi böhranın səngiməsinə baxmayaraq, paytaxtda mənzillərin qiyməti ucuzlaşmaqda davam edir. Ekspertlərin rəyinə görə, evlərin qiymətinin düşməsi  növbəti ildə də davam edəcək. Buna səbəb isə iqtisadi aktivliyin azalması fonunda bazara çıxarılan mənzillərin sayının çoxluğu, qiymətlərin şişirdilmiş olmasıdır.

İqtisadçı alim Vüqar Bayramovun fikrincə,  mənzillərin qiymətinin ucuzlaşması proqnozlaşdırılan idi: “Monitorinqlər mənzil bazarında tələbatın artmasının  müşahidə edilmədiyini göstərir.Bununla yanaşı  alıcıların sayının azalması qiymətlərin artmasına, eləcə də stabilləşməsinə imkan vermir”.

Mütəxəssis deyir ki, qiymətlərin aşağı düşməsinin əsas səbəbi alıcıların azlığına rəğmən bazara  çıxarılan  mənzilllərin sayının   çoxluğudur: “Mənzillərin qiymətinin düşməsinin daha bir səbəbi Bakida evlərin  qiymətinin yüksək olmasıdır. Hətta indiki qiymətlər belə iqtisadi səbəblərlə izah edilə bilməz”.

Paytaxtda mənzillərin qiymətini Şərqi və Qərbi Avropa ölkələrində mənzillərin qiyməti ilə müqayisə edən iqtisadçı bildirir ki, Berlində 50 min avroya 3 otaqlı mənzil almaq mümkündürsə, Bakının mərkəzi rayonlarında 50 min avroya 2 otaqlı mənzil yoxdur.  O baxımdan V.Bayramov hesab edir ki, hazırkı qiymətlər də kifayət qədər yüksək,  süni və şişirdilmis  qiymətlərdir. .

V.Bayramov hesab edir ki,         qiymətlərin şişirdilməsi, eləcə də süni olması evlərin ucuzlaşmasını stimullaşdıran səbəblərdəndir. Məlum olur ki, yeni tikililərə tələbat da aşağı düşüb: “İpoteka proqramı  mənzil bazarında canlanmanın yaranmasına, qiymətlərin artmasına və yaxud stabilləşməsinə stimul yarada bilmir. Çünki proqramın Bakının 1-ci və 2-ci zonalarındakı mənzil bazarına təsir imkanları yoxdur.Belə ki, adi ipoteka kreditlərində maksimum məbləğ 50 min, sosial ipoteka kreditlərində isə 35 min manatdır”.

Mütəxəssis qeyd edir ki, İpoteka Fondunun  “Standart paket”ın ardınca   ipoteka krediti almaq  üçün tələb olunan ilkin məbləği 15%-dən 20%-ə qaldırılması bu xəttlə ev alanların sayının azalmasına gətirib çıxaracaq: “Güman edilir ki, Bakının mənzil bazarında durğunluq yaxın aylarda da davam edəcək və qiymətlərin artması gözlənilmir. Əksinə, ilin sonu, gələn ilin əvvəllərində evlərin qiyməti düşəcək”.