Vüqar Bayramova imza verən seçicilərə təzyiqlərə başlanılıb

Tanınmış iqtisadçı alimin ölkə başçısına müraciəti yerli icra hakimiyyəti orqanlarında təlaş yaradıb

Xəbər verdiyimiz kimi 83 saylı Ağcabədi-Füzuli dairə seçki komissiyası saxta arqumentlər ilə qanunsuz olaraq tanınmış iqtisadçı Vüqar Bayramovun namizədliyini qeydə almaqdan imtina edib. DSK  əsas səbəb kimi təqdim olunan imzaların 425-nin etibarlı olması, namizədliyin qeydiyyata alınması üçün 25 etibarlı imzanın çatmamasını gətirib. Namizədin seçki qərargahından isə bildirirlər ki, imzaların yığılması prosesinə Vüqar Bayramovun özü birbaşa nəzarət edib. İmzalar yığılan zaman bir nəfərin digərinin əvəzinə imza atması faktına yol verilməyib

Bü gün isə məlum olub ki, V.Bayramova imza verən seçicilərə təzyiqlərə  başlanılıb. Füzuli Rayon icra hakimiyyətinin yerli nümayəndələri  ev-ev gəzib iqtisadçıya imza verən seçicilərdən izahat almağa çalışaraq, onları imzalarından imtina etməyə məcbur edirlər. Bu barədə iqtisadçı alimin seçki qərargahına təzyiqlərə məruz qalan imza vərəqəqlərində adı olan seçicilər bildirib. Seçki qərargahından deyilir ki, seçicilərə qarşı müxtəlif təzyiqlərdən istiadə olunur: “İzahat yazmaq istəməyən vətəndaşlara hədə-qorxu gəlirlər. Onların özlərini və ya yaxınlarının işdən çıxarmaqla hədələyirlər”.

Qərargahdan bildirirlər ki, seçicilərə qarşı təzyiqlər V.Bayramovun ölkə prezidentinə etdiyi müraciətlə bağlıdır:”83 saylı Ağcabədi-Füzuli seçki dairəsində saxtalaşdırma aparan yerli icra hakiyyəti məsələnin böyüməsinə, haqsızlığın üzə çıxmasından ehtiyatlanaraq belə addımlar atır.   Bu arada qeyd etdiyimiz kimi, icra hakimiyyəti orqanları əvvəldən dairədə bütün şanslı namizədləri sıradan çıxarmaq niyyətində idi. O baxımdan, yerli icra hakimiyyəti orqanları özlərini “sığortalamağa” çalışaraq seçiclərdən məcburi və qanunsuz olaraq izahatlar almağa çalışırlar. İmza vərəqələrində adları olan seçicilərin təzyiqlərə baxmarayaq saxta izahatlar yazmaqdan imtina etməsi isə icra orqanlarının işini ağırlaşdırıb”.

Yeri gəlmişkən, seçicilərə təzyiqlər ilə bağlı iqtisadçı-alim Prezident Administrasiyasının rəhbəri Ramiz Mehdiyevə, Mərkəzi Seçki Komissiyasının Məzahir Pənahova müraciət edib.