Rezervlərin yığım valyutasına dəyişikliklər edilə bilər 

 Avronun məzənnəsində proqnozlaşdırılan artımlar davam etməkdədir. Təkcə son iki həftədə  avronun məzənnəsi 10 faizə yaxın artıb. Nəticədə 1 avro 1 manat 12 qəpiyə qədər yüksəlib. Xatırladaq ki, hələ bir müddət əvvəl İqtisadi vəSosial İnkişaf Mərkəzinin (İSİM)ekspertləri avronun məzənnəsinin yüksələcəyi ilə proqnozlar vermişdilər. Hətta avronun məzənnəsi kəskin azalan zaman avro ilə depozitlərini dəyişməməyi tövsiyyə etmişdilər.

Avronun məzənnəsi ilə bağlı mövcud situasiyanı qiymətləndirən İSİM rəhbəri Vüqar Bayramov bildirir ki, avronun məzənnəsinin yüksəlməsi Azərbaycan iqtisadiyyatına birbaşa təsir göstərən faktorlardan biridir: “Avronun məzənnəsinin manata nisbətən yüksəlməsi Avropa Birliyi ilə ticarət əlaqəsi quran iş adamlarının Avropada rəqabət aparma imkanlarını genişləndirir”. Onun fikrincə, avronun məzənnəsinin möhkəmlənməsi yerli məhsullara  Avropada daha çox rəqabət aparma imkanları verə bilər.

Ekspert həmçinin hesab edir ki,   avronun məzənnəsinin yüksəlməsi yalnız Avropaya ixracın stimullaşdırılması baxımından deyil,  dövlət rezervlərinə təsir baxımından da önəmlidir: “Nəzərə alsaq ki, dövlət rezervlərinin təxminən 35 faizi avro ilə saxlanılır, avronun məzənnəsinin yüksəlməsi dövlət rezervlərinin manatla ifadəsində artımlara gətirib çıxaracaq. Yəni avronun məzənnəsinin yüksəlməsi həm Mərkəzi Bankın, həm də Neft Fonunun  idarə eydiyi rezervlərin manatla ifadəsində artımları şərtləndirir”.

İqtisadçı dolların məzənnəsinin azalması fonunda avronun məzənnəsinin yüksələcəyinin güman edildiyini söyləyir: “Avronun məzənnəsinin yüksəlməsi yalnız Avropa iqtisadiyyatında müşahidə edilən iqtisadi artımla deyil, Avropa iqtisadiyyatına dair proqnozların nibkin olması ilə əlaqədardır.  Eyni zamanda avronun möhkəmlənməsində dolların məzənnəsinin aşağı düşməsi fonunda Amerika Birləşmiş Ştatları iqtisadiyyatında, xüsusilə məşğulluq siyasətində müşahidə edilən problemlər, neftin qiymətinin yüksəlməsi də rol oynayır”.

Mütəxəssis bildirir ki, neftin dünya bazar qiymətinin yüksəlməsi dolların avroya nisbətən aşağı düşməsini stimullaşdırır: “Xarici faktorlar avronun məzənnəsində artımların davamlı olacağından xəbər verir. Məzənnənin yüksəlməsi həmçinin rezervlərin yığımı valyutasına müəyyən dəyişikliklərin baş verməsinə gətirib çıxara bilər”.