Vüqar Bayramov Kral İqtisadiyyat Akademiyasına üzv seçilib

İqtisadçı-alim Böyük Britaniyanın aparıcı akademiyasında Azərbaycanı təmsil edəcək

Kral İqtisadiyyat Akademiyası İqtisadi və Sosial İnkişaf Mərkəzinin (İSİM) rəhbəri Vüqar Bayramovun sözügedən quruma üzv olması barədə qərar qəbul edib.Nəzərə çatdıraq ki,  Londonda yerləşən Akademiyanın İdarə Heyəti bu barədə qərarı avqustun 19-da keçirilən yığıncağında verib. Həmçinin azərbaycanlı alimin beynəlxalq ekspertlərdən təşkil edilən “İnkişaf Ekspert Qrupunda” təmsil olunması razılaşdırılıb.  O cümlədən  V.Bayramovun Akademiyanın bu ilin oktyabrında təşkil ediləcək illik konfransına spikerlərdən biri kimi dəvət edilməsi planlaşdırılıb.

İSİM-dən  verilən məlumata görə, Akademiya Vüqar Bayramovun elmi fəaliyyətini və eləcə də xarici ölkələrdə çap edilən əsərlərini tədqiq edərək bu qərarı verib. Azərbaycanlı alim bildirib ki, sözügedən qurum nəinki Böyük Britaniya və ya Avropada, eləcə də dünyada  aparıcı elmi mərkəzlərindən hesab edilir. Akademiyada dünyanın aparıcı iqtisadçıları toplaşıb ki, bu da onun dünya elminə və iqtisadiyyatına təsir imkanlarını artırır. Akademiyanın nəşr etdiyi jurnallar dünyanın ən reytinqli nəşrləri sırasına daxildir. Eyni zamanda Akademiya inkişaf etməkdə olan ölkələrdə iqtisadi inkişafın və eləcə də islahatların dəstəklənməsinə ünvanlanan proqramlar həyata keçirməkdədir.

Vüqar Bayramov deyib ki, kifayət qədər nüfuzu olan bu qurumda azərbaycanlı alim kimi onun  təmsilçiliyi  ölkəmiz üçün uğur hesab edilə bilər: “Artıq Azərbaycanın elm adamları da beynəlxalq təşkilatlarda bərabər hüquqlu üzv kimi təmsil olunurlar”.

Xatırladaq ki, Vüqar Bayramovun adı bu ay ABŞ-ın məşhur Corctaun Universiteti tərəfindən hazırlanan “Dünyanın ən nüfuzlu 500 müsəlmanı” hesabatına da daxil edilib.