|
|
|
İlin 2-ci yarısında ciddi qiymət artımları
gözlənilir
Vüqar Bayramov: “İllik inflyasiya 8 fazidən aşağı
olmayacaq”
Cari ilin 6 ayında Azərbaycanda inflyasiya 4,9 faiz
təşkil edib. Mərkəzi Bankın məlumatına görə, 2010-cu
il üçün illik inflyasiya 4,5 olacaq. O da
bildirilir ki, inflyasiyanın 43.3 faizi xarici
faktorlarla bağlıdır. Bu arada Dövlət Statistika
Komitəsi 2010-cu ilin iyul ayı üçün istehlak
mallarının və xidmət tariflərinin statistikasını
açıqlayıb. Komitə iyun ayı ilə müqayisədə ötən ay
0,2 faiz ucuzlaşma baş verdiyini bəyan edib.
Qurumdan deyilir ki, ay ərzində ərzaq məhsullarının
qiymətləri 0,7 faiz ucuzlaşıb.Əhaliyə göstərilən
pullu xidmətlərin qiymət isə əksinə 0,9 faiz
bahalaşıb. Məlum olur ki, ötən ayda ərzaq
məhsullarından buğda çörəyinin, toyuq əti və toyuq
budunun, təzə balığın, balıq konservlərinin, bərk və
əridilmiş pendirin, kərə yağının, şəkər və şəkər
tozunun, bananın, almanın, armudun, alçanın,
şaftalının, qarpız və yemişin, pomidorun, xiyarın,
badımcanın, lobyanın, soğanın, kartofun qiymətləri
ucuzlaşıb. Lakin ucuzlaşma ilə yanaşı ay ərzində
bəzi ərzaq məhsullarının qiymətlərində bahalaşma da
müşahidə olunub.Belə ki, buğda ununun, manna və
qarabaşaq yarmasının, mal və qoyun ətinin, suda
bişmiş kolbasanın, pasterizə olunmamış üzlü südün,
xamanın, süfrə marqarininin, brınza pendirinin,
yumurtanın, zeytun və qarğıdalı yağının, limonun və
sairin qiymətləri bahalaşıb. Pullu xidmətlərdən isə
xaricə hava və dəmir yolu sərnişindaşıma nəqliyyatında,
təhsil haqqları üzrə tariflərdə artımlar qeydə
alınıb.
İqtisadçı-ekspert Vüqar Bayramov bildirir ki, ilin
1-ci yarısında 4,9 faiz inflyasiya müşahidə edən
Mərkəzi Bankın illik inflyasiya həddini 4,5 faiz
proqnozlaşdırması iqtisadi baxımdan qəbuledilən
deyil: “Çünki, ilin ikinci yarısında 1-ci yarısına
nisbətən daha yüksək qiymətartımları
proqnozlaşdırılıb. Bu onunla bağlıdır ki, ərzaq və
kənd təsərrüfatı məhsullarının qiymətlərində iyul
ayından başlayaraq qiymət artımları müşahidə edilir.
Hasıki, bu da illik inflyasiya dərəcəsinin yüksək
olmasına gətirib çıxaracaq”.
Cari ildə kənd təsərrüfatı məhsullarının orta
qiymətinin son 10 ildə ən yüksək qiymətlər hesab
edildiyini vurğulayan iqtisadçı artımların iyuldan
başlayaraq müşahidə olunduğunu i bildirir: “Bu
Azərbaycanın istehlak bazarının ilin 2-ci yarısına
daha yüksək qiymət artımları ilə daxil olmasından
xəbər verir”.
Payız aylarında yeni qiymət artımlarını istisna
etməyən ekspertin sözlərinə görə, bu həm bir sıra
kənd təsərrüfatı məhsullarının mövsümi olaraq
qıtlığının yaranması, həm də əməkhaqqı və
pensiyaların artırılması qərarının istehlak
bazarına gözlənilən müəyyən təsirləri ilə bağlı
olacaq: “ O baxımdan inflyasiyanın minimum
həddinin 4,5 faiz göstərilməsi real deyil. Başqa
tərəfdən daxili və xarici faktorları nəsərə alsaq bu
ilin 2-ci yarısında qiymət artımları 1-ci yarısına
nisbətən daha yüksək olacaq”.
V.Bayramov deyir ki, Mərkəzi Bank inflyasiyada
xarici faktorların payını 43,3 faiz göstərsə də,
Azərbaycanda 2010-cu ildə müşahidə edilən
inflyasiya heç də daha çox xarici fakorlardan irəli
gəlmir:”Azərbaycanın ərzaq və qeyri-ərzaq məhsulları
idxal etdiyi ölkələrdə xüsusilə ilin birinci
yarısında ciddi qiymət artımları müşahidə edilməyib.
Avronun məzənnəsinin aşağı düşməsi fonunda
Azərbaycanın əsas tərəfdaşı olan ölkələrin
valyutalarının dollara nisbətən məzənnəsi cüzi
dəyişib. Bu idxal inflyasiyasının 2010-cu ilin 1-ci
yarısında az aktiv olmasından xəbər verir. Başqa
tərəfdən neftin dünya bazar qiyməti göstərilən
tarixdə 70 dollar intervalında dəyişib. Hansıki, bu
da dünya bazarında ciddi qiymət arınmlarına gətirib
çıxarmır. Qlobal maliyyə böhranın davam etməsi isə
dünya bazarında bahalaşmaya deyil, əksinə bir sıra
məhsullar üzrə qiymətlərin düşməsinə səbəb olub”.
Bununla belə iqtisadçı xarici faktorların
inflyasiyaya təsirinin 2010-cu ilin ikinci yarısında
ilin 1-ci yarısına nisbətən daha aktiv olacağının
proqnozlaşdırıldığını söyləyir: “Neftin dünya bazar
qiymətində artımlar müşahidə edilməkdədir. Belə ki,
neftin dünya bazar qiyməti 1 barel üçün 80 dolları
keçib. O cümlədən ərzaq məhsullarının qıtlığı
səbəbindən Azərbaycanın əsas ərzaq məhsulları idxal
etdiyi dövlətlərdə ilin 2-ci yarısından qiymət
artımları gözlənilir. Artıq qonşu ölkələrdə
iyuldan başlayaraq bir sıra ərzaq məhsullarının
qiymətində artımlar müşahidə edilir. Bütün bunlara
baxmayaraq ilin 2-ci yarısında Azərbaycanda
inflyasiya daha çox daxili faktorlarla əlaqəli
olacaq. Yəni kənd təsərrüfatı məhsullarının qıtlığı
bazara neqativ təsir göstərəcək”.
Mütəxəssis bildirir ki, gömrük prosedurlarının
sadələşdirilməməsi, ərzaq və qeyri ərzaq
məhsullarının idxalı ilə bağlı problemlərin, eləcə
də idxalda inhisarın qalması və ya son aylar daha da
ğüclənməsi ilin 2-ci yarısında qiymət artımlarını
tənzimləyən, qüvvədə saxlayan ənənəvi faktorların
qüvvədə qalacağından xəbər verir: “Müşahidələr,
soğular və inflyasiyanı tənzimləyən faktorlar bu il
üçün illik inflyasiyanın 8 fazidən aşağı
olmayacağını göstərir.Qiymət artımları daha çox
noyabr,dekabr aylarında müşahidə ediləcək”.
|