Son iki ayda 3 pulköçürmə şirkətinin fəaliyyəti dayandırılıb

Vüqar Bayramov: “Mərkəzi Bank  metodları dəyişməlidir”

Azərbaycan Mərkəzi Bankı (AMB) Rusiyanın «Kontakt» pulköçürmə sistemi ilə əlaqələrini kəsib. Səbəb bu sistem vasitəsi ilə işğal altında olan ərazilərdə pul köçürmələrin həyata keçirilməsidir. MB-nın  məlumatına görə , xəbərdarlıqlara baxmayaraq «Contact» pulköçürmə sistemi Azərbaycanın işğal altında olan ərazilərində qanunsuz fəaliyyətini davam etdirib. Nəticədə Mərkəzi Bank avqustun 2-dən etibarən Azərbaycandakı bütün banklara bu sistemlə işgüzar münasibətlərin dayandırılmasını tapşırıb. Qeyd edək ki, Azərbaycan bankları iyunun 8-də və 11-də müvafiq olaraq «Migom» və «Leader» pulköçürmə sistemləri ilə eyni səbəblərə görə əməkdaşlığı dayandırıb.

İqitisadi və Sosial İnkişaf Mərkəzinin rəhbəri Vüqar  Bayramov Mərkəzi Bankın pulköçürmə şirkətinin lisenziyasını geri alması   səbəblərini başadüşülən hesab edir : “Çünki, bütün hallarda Mərkəzi Bank həmin şirkətlərə Azərbaycanın işğal olunmuş ərazilərində işləməməklə bağlı rəsmi xəbərdarlıq edib. Lakin onlar  bankın bildirişinə məhəl qoymadan bu fəaliyyəti həyata keçiriblər. Xatırladım ki, Mərkəzi Bank əvəllər də işğal olunmuş ərazilərdə fəaliyyət göstərən pulköçürmə şirkətlərinin lisenziyalarının geri alınması istiqamətində qərar vermişdi. Praktiki son aylar bankın lisenziyaları geri alması ənənəvi xarakter daşıyır”.

Mütəxəssis hesab edir ki, Mərkəzi Bank işğalı olunmuş ərazilərdə qanunsuz fəaliyyət göstərən pulköçürmə şirkətlərinə qarşı tətbiq etdiyi metodları dəyişməlidir. Şirkətlərə lisenziyaları geri almaqla deyil, digər  metodlarla təsir göstərməyə çalışmalıdır: “Lisenziyaların geri alınması hələlik şirkətlərə ciddi təsir göstərmir. Yəni lisenziyası geri alınmayan digər şirkətlər də var ki, sözügedən ərazilərdə faəliyyətlərini davam etdirirlər. Mərkəzi Bank bütün şirkətlərin lisenziyasını geri alacaq?”

beynəlxalq konvensiyaların  Mərkəzi Banka Azərbaycanın ərazi bütövlüyünə xələl gətirən addımlar atan şirkətlərlə bağlı beynəlxalq məhkəmələr qarşısında vəsatət qaldırmağa imkan verdiyini söyləyir. .

V.Bayramov bildirir ki,  Azərbaycanın işğal olunmuş ərazilərində qanunsuz fəaliyyət göstərən şirkətlərlə əlaqədar  məsələnin beynəlxalq məhkəmələr qarşısında qaldırılması Mərkəzi Banka bu şirkətlərə barəsində  daha ciddi addımların atılmasına nail olmaq imkanı verəcək: “Mərkəzi Bank beynəlxalq məhkəmələr vasitəsilə həmin  şirkətlərə qarşı maliyyə sanksiyalarının tətbiq edilməsinə, hətta bir sıra hallarda fəaliyyətlərini dayandırmalarına yönəlik  addımların atılmasına  nail ola bilər.

Əgər Mərkəzi Bank bir şirkətə qarşı belə bir iddia ilə cıxış etsə, bu, digərlərinə də mesaj olacaq. Şirkətlər artıq Mərkəzi Bankın onların lisenziyasını ləğv etmək qorxusundan deyil, məsələlərin beynəlxalq arenada qaldırılmasından çəkinəcəklər.

Ekspertə görə,  Mərkəzi Bankın işğal olunmuş ərazilərdə fəaliyyət göstərən şirkətlərlə  bağlı hazırda tətbiq etdiyi metodla nə  pulköçürmə şirkətlərinin oradakı fəaliyyətinin qarşısını almaq mümkün olacaq, nə də gələcəkdə bu cür faktların təkrarlanmayacağından  sığortalanmaq: “Mərkəzi Bank məsələyə daha qlobal yanaşmalıdır. Çalışmalıdır ki, problemi qlobal səviyyədə həll etsin. Bu eyni zamanda həmin şirkətlər üçün əlavə xərcin yaranmasına, Azərbaycanın ərazilərinin  işğal olunması faktının beynəlxalq müstəviyə çıxarılmasına gətirib çıxaracaq”.