Neftin bahalaşması yeni böhrana yol aça bilər
Vüqar Bayramov: “İndiki qiymət artımları nə neft
istehsalçıları nə də ixracatçıları üçün məqbul hesab
edilmir”
Dünya bazarında neftin qiymətinin artması prosesi
davam edir. Nyu-Yorkdakı “NYMEX” birjasında WTI
markalı neft 0,45 dollar yüksələrək 89,92 dollar
olub. Londondakı “ICE” birjasında isə Brent markalı
neft 0,46 dollar bahalaşaraq 93,20 dollar təşkil
edib. “Qara qızılın”
sürətlə bahalaşma səbəblərini şərh edən İqtisadi və
Sosial İnkişaf Mərkəzinin rəhbəri Vüqar Bayramov
Avropa Birliyi iqtisadiyyatında müşahidə edilən
böhranın, eləcə Amerika iqtisadiyyatındakı
durğunluğun fonunda neftin dünya bazar qiymətinin
kəskin artmasının heç də birmənalı qarşılanmadığını
vurğulayır: “Baxmayaraq ki, Amerika Birləşmiş
Ştatlarında noyabr-dekabr aylarında yanacağa olan
tələbatın artması nəticəsində neftə də tələbat
artmışdı. Lakin bu neftin qiymətinin kəskin
artması üçün əsas yarada bilməz. İstər OPEK-in ,
istərsə də inkişaf etmiş ölkələrin açıqlamalarında
neftə olan tələbatın kəskin artması müşahidə
edilməyib. Neftin bahalaşması iqtisadi səbəblərlə
əsaslandırılmır. Burada süni, spekulyativ amillərin
rolu var. Bu da dünya iqtisadiyyatında müəyyən
narahatçılığın yaranmasına gətirib çıxaracaq”.
Ekspertin qiymətləndirməsinə
görə, indiki qiymət artımları nə neft istehsalçıları,
nə də istehlakçıları üçün məqbul hesab edilmir. Onun
fikrincə, neftin qiymətinin bahalaşması davam
edəcəyi halda dünya iqtisadiyyatını ciddi
problemlər gözləyəcək: “ OPEK 2010-cu ilin iyununda
keçirilən toplantısında neftin 1 barelinin 100
dollardan artıq olmasının arzuolunan hesab
edilməməsi barədə açıqlama yaymışdı: “Güman
olunurdu ki, neftin qiyməti 70-80 dollar
intervalında stabilləşəcək.
Amma son psixoloji artımlardan sonra Amerikanın
əksər investisiya şirkətləri, o cümlədən City Morgan
2011-ci ilin ortalarına qədər neftin qiymətinin 100
dolları keçəcəyi, 2012-ci ildən isə 120 dollara
satılacağı barədə proqnozlar verməkdədir”.
İqtisadçı qeyd edir ki, neftin qiymətinin psixoloji
həddi keçməsi iqtisadi baxımdan dünya iqtisadiyyatı
üçün arzuolunan deyil: “2011-ci ilin əvvəllərində
neftin qiymətinin 100 dollarlıq psixoloji həddi
keçəcəyi halda dünya iqtisadiyyatını kifayət qədər
ciddi böhranın gözləyəcəyi güman edilir. Çünki
neftin qiymətinin spekulyativ artımları sonrakı
mərhələdə dünya iqtisadiyyatında, xüsusən də Avropa
Birliyində böhranın müşahidə olunması ilə nəticələnə
bilər.O baxımdan indiki qiymət artımlarının kifayət
qədər qorxulu mesajı var”.
Neftin qiymətinin yüksəlməsinin Azərbaycan
iqtisadiyyatına təsirlərinə gəlincə, iqtisadçı
bildirir ki, neft ölkəsi kimi Azərbaycan prosesdə
maraqlıdır: “Lakin nə Azərbaycan, nə də digər neft
ölkələri neftin qiymətinin süni və spekulyativ
şəkildə artmasının tərəfdarı deyillər.Söylədiyim
kimi belə artımlar sonrakı mərhələdə kəskin qiymət
azalmaları ilə əvəz oluna bilər. Bu da Azərbaycanın
perespektiv gəlirlərinin azalmasına səbəb olar. Yəni
son qiymət artımları neft satışından əldə edilən
dövlət gəlirlərinin artmasına səbəb olsa da
uzunmüddətli perespektivdə ölkə üçün arzuolunan
deyil”.
|