Ramazan ayı bazarlarda qiymətləri  bahalaşdırdı

Hər il olduğu kimi bu ildə Ramazan ayının başlaması bazarda süni qiymət artımlarına stimul verib. Belə ki, bayram menyusuna daxil olan əsas ərzaq məhsullarının demək olar ki, hamısında bahalaşma müşahidə edilməkdədir.Məsələn Ramazana qədər 1 manat təşkil edən pomidorun hazırkı qiyməti 2 manatdır. Eləcə də digər ərzaq məhsullarının qiymətlərində eyni proses gedib. Diqqəti çəkən isə Azərbaycanda qiymətlərin od püskürdüyü halda  digər müsəlman ölkələrində Ramazan ayı ilə əlaqədar əsas ərzaq və kənd təsərrüfatı məhsullarının qiymətlərinin ucuzlaşmasıdır.  "Ramazan endirimləri" adlı geniş kampaniyalara start verilib.

Bazarlarda  müşahidə edilən bahalaşmanı şərh edən iqtisadçı-ekspert Vüqar Bayramova görə, qiymət artımları süni  xakter daşıyır: “Bayramın təsadüf etdiyi ayın başlaması ilə əlaqədar daha çox istehlak edilən ərzaq məhsullarının bahalaşması süni qiymət artımıdır.            İstehlakçıların bu ay üçün məcburi tələblərini nəzərə alaraq bayram menyusuna daxil olan məhsulların qiymətləri artırılıb”.

İqtisadçının fikrincə, iqtisadi inkişaf nazirliyi bu artımlara qarşı mübarizəni gücləndirməlidir: “Ramazan ayının başlaması ilə müşahidə edilən bahalaşma iqtisadi baxımdan izah edilən deyil. Məsələnin digər tərəfi isə Ramazan ayında qiymət artımlarına gedilməsidir. Bir sıra müsəlman ölkələrində müqəddəs hesab edilən aylarda qiymətlərin azaldılması baş verir. Bununla da aztəminatlı vətəndaşların tələb olunana məhsulları almalarına şərait yaradılır. Hətta Amerika Birləşmiş Ştatlarında milli bayramlarda əsas ərzaq məhsullarının     qiymətlərində endirimlər müşahidə edilir”.

Əksər müsəlman ölkələrində Ramazan ayı ərəfəsində süni qiymət artımlarına gedənlərə qarşı ciddi tədbirlər həyata keçirildiyini vurğulayan V.Bayramov bununla bahalaşmaının qarşısının alındığını deyir: “Ramazan ayında süni şəkildə baş verən qiymət artımları haram qiymət artımlarıdır. Nəzərə almaq lazımdır ki, Ramazanda hər bir vətəndaş imkansız ailələrin ərzaq məhsullarına əlçatanlığının təmin edilməsinə yardım etməlidir. Son qiymət artımları heç bir halda qəbul edilən hesab olunmamalıdır”.

Ekspert bildirir ki, qiymət artımlarına qarşı İqtisadi İnkişaf Nazirliyinin mübarizəsi ilə yanaşı satıcıların özləri də  bahalaşmaya getməyə meyilli olmamalıdırlar. Çünki, süni qiymət artımları halal olmadığından əldə edilən gəlir və ya mənfəət də  halal hesab edilmir.

İqtisadçı adətən bayramlardan sonra qiymətlərdə dəyişiklik baş vermədiyinə də diqqət çəkdi: “Bayram ərəfəsi bahalaşdırılan qiymətlər sonrakı artımlar üçün başlanğıc olur”.