Müəllif Hüquqları Necə Qorunur?

Vüqar Bayramov: “Müəllif hüquqlarının qorunmasındakı nöqsanlar sahibkarlara milyonlarla ziyan vurur”

Azərbaycan Avropada müəllif hüquqlarının ən çox pozulduğu ölkələrdən biridir. Müəllif mülkiyyət hüquqlarının qorunması ilə bağlı standartların Avropa Birliyi standartlarına uyğunlaşdırılmasında yubanmalar ölkəmizin Ümumdünya Ticarət Təşkilatına  (ÜTT) üzvlüyünü də əngəlləyir. Diqqəti çəkən isə  müəlliflik hüquqlarını pozanların sahibkarların məhz özlərinin olmasıdır. Belə ki, onlar həmkarlarının müəlliflik hüquqlarına hörmətlə yanaşmırlar. Norveç Beynəlxalq Əlaqələr İnstitutunun (NUPI) dəstəyi ilə bu sahəni tədqiq edən iqtisadçı-alim Vüqar Bayramov bildirir ki, müəlliflik hüquqları ilə bağlı qanunvericiliyin təkmilləşdirilməsinə və yeni qanunvericilik aktlarının qəbul edilməsinə ehtiyac var. V.Bayramov qeyd edir ki, ÜTT-ə üzv olmağın əsas tələblərindən biri məhz müəllif hüquqlarının qorunması ilə bağlı yeni standartların tətbiq edilməsidir: “Mövcud qanunvericiliyin icrasında qüsurlar var. Problemlər yalnız xarici deyil, eləcə də yerli müəlliflik hüquqlarının qorunması ilə bağlıdır”.

V.Bayramov deyir ki,  müəlliflik hüquqlarının qorunması ilə bağlı qanunvericilik aktlarının Berne və Paris Konvensiyalarına uyğunlaşdırılması ilə yanaşı Avropa Birliyi standartları da nəzərə alınmalıdır: “Tədqiqatlar göstərir ki, mülkiyyət hüquqlarının qorunmaması səbəbindən sahibklarar hər il milyonlarla ziyan dəyir. Əslində bu da gizli iqtisadiyyatın bir formasıdır. Bu baxımdan müəlliflik hüququnu pozanlara qarşı mübarizənin genişləndirilməsinə ehtiyac var”.