Vüqar Bayramov yeni təyinatla bağlı yayılan xəbərlərə münasibət bildirib

 Iqtisadçı alim jurnalistlərin çoxlu saylı müraciətlərini cavablayaraq bir sıra aparıcı qəzet və internet portallarında özünün iqtisadi inkişaf naziri postuna gətiriləcəyi ilə bağlı açıqlamalara münasibət bildirib. V.Bayramov bildirib ki, özü və rəhbərlik etdiyi İqtisadi və Sosial İnkişaf Mərkəzi (İSİM) müxtəlif dövlət qurumları ilə iqtisadi islahatların səmərəli aparılması istiqamətində müzakirələr aparır. Yalnız ötən il İSİM-in hazırladığı 10 təklif hökumət tərəfindən qəbul edilib. Son günlər də anti-korrupsiya tədbirlərinin daha səmərəli aparılması və davamlı olması ilə bağlı müxtəlif dövlət qurumları və bəzi rəsmilərlə müzakirələrimiz  olub. Bununla belə, konkret olaraq iqtisadi inkişaf naziri vəzifəsinə  təyanatla bağlı məsələ müzakirələrin predmeti olmayıb.

İqtisadçı alim bildirib ki, iqtisadi qurumlara onun və ya başqasının rəhbərlik etməsi önəmli deyil: “Əsas odur ki, anti-korrupsiya tədbirlərinin davamlılığının   təmin edilməsi və bu tədbirlərin kompleks aparılması üçün dövlət qurumlarına korrupsiyada adları hallanmayan və ölkəsinin inkişafı üçün çalışan insanlar rəhbərlik etsinlər”.  Hökumətin gəncləşdirilməsi siyasətinin daha səmərəli olması ilə bağlı fikirləri bölüşdüyünü vurğulayan İSİM rəhbəri bildirib ki, mərkəz anti-korrupsiya tədbirlərinin davamlı olması üçün “Korrupsiyaya Qarşı Mübarizə Tədbirləri” haqqında Təkiflər Paketi hazırlayıb. Hal-hazırda təkliflər paketinin tətbiqi ilə bağlı müzakirələr davam etdirilir.

Xatırladaq ki, ABŞ-ın Vaşinqton Universitetinin məzunu olan, Qazaxıstanda Anti-böhran, Yunanıstanda isə Stabilləşmə proqramlarının hazırlanmasında iştirak edən Vüqar Bayramov ekspert kimi müxtəlif ölkələrin inkişaf proqramlarının hazırlanmasına cəlb edilib. Ötən il ölkə prezidentinin də adının daxil edildiyi ABŞ-ın Corc Taun Universitetinin hazırladığı “dünyanın ən nüfuzlu 500 müsəlmanı” hesabatında yer alan azərbaycanlı alimin iqtisadi əsərləri dünyanın 25 dilinə tərcümə edilib. V.Bayramov Böyük Britaniyanın Kral Akademiyasının üzvü olan yeganə azərbaycanlı iqtisadçıdır.